الميم | جاسر جمال الدين

الموت مش مجرد جسم مرمى ومتلقح
متجرح مقتول مسموم ..
الموت سلالم بتسلم للسما مراسيل
ماهو مش ممكن نمحى مذكرات بحجم الملكوت
ممكن مرورها لجسم مولود
بيشم نسيم امه من بسمتها
ويمارس تمارين الملل بتمكن
الدم بيزمل الميت
وممكن يترسم بمشيمه...
ورحم ملحقش المد
فتمدد..
مدمد دمامل متسممه
اليوم صيام ..
والمادنه بتتهدم فتردم تميمة المارد
مولانا بيتمتم بكلام موزون..
ويمارس استمنائه ويسميه مشيئه
ويسمى جماع المغرمين والهام الامل..
مجون
المادنه رمز
والسما رمز..
والعما لما بيجمل تماثيل المتحف
وبيهمل مساكين المقابر ..
حتما رمز
ريم الموج مش كماله..
والمستحيل ممكن ..
لما بيتم تمجيد مخ المجانين
وتجميد رماد الجثمان المتنتور
بمحيط الزمن
ممكن تمشى من قدامى ...
وماتمشيش
ملمس سلامك
بيهمس بترانيم مهمله من امد
ممكن تغمينى وهلمحك مكانك
بتلم رسمى المنعكش
وترميه للغمام